Шымкент қаласында Мемлекет басшысы Қасым-Жомарт Тоқаевтың бастамасымен жүзеге асып жатқан  «Таза Қазақстан» республикалық экологиялық акциясы жалғасуда. Осы орайда, Қаратау ауданындағы Нұртас шағын ауданында «Таза аула» акциясы өтті. Бұл туралы Шымкент қаласының Өңірлік коммуникациялар қызметі хабарлады.  

Мұндай ізгі шара - қаланың барлық аудандарында жаппай өткізілуде және қоқыстарды жинау, тазалықты сақтау, жалпы қоршаған ортаға ұқыпты қарау құндылықтары мен мәдениетін қалыптастыруға ықпал етеді.

Тазалық шарасына аудан тұрғындары, белсенді жастар мен «Жасыл ел» жасақтарының мүшелері қатысып, өздерінің аулалары мен іргелес аумақтарды ретке келтіру жұмыстарын жүргізді. Сондай-ақ, іс-шарада аулаларды тазалау, қоқыстар шығару, қураған ағаштарды кесу, қоршаулар мен орындықтарды сырлау жұмыстары жүргізілді.

«Бүгін Президентіміздің тапсырмасы аясында «Таза Қазақстан» экологиялық республикалық акциясы қазір барлық елді мекендерде қолдау тауып отыр. Өйткені тазалық бірінші - денсаулық, екінші - мәдениет. Елдің азаматтары өзінің ортасының табиғатын тазалағын сақтап отыру үлкен әлеуметтік маңызға ие деп ойлаймын. Тазалық - әрбір үйдің өзінен басталады», – деп атап өтті Еңбекші аудандық ардагерлер кеңесі төрағасының орынбасары Пердеш Есенбек.

Еске сала кетейік, «Таза Қазақстан» республикалық акциясы Мемлекет басшысының тапсырмасы бойынша елді мекендердің аумақтарын абаттандыру және көгалдандыруға, қоршаған ортаға ұқыпты қарау құндылықтарын қалыптастыруға, халық арасында жоғары азаматтық жауапкершілік пен экологиялық мәдениетті тәрбиелеуге бағытталған.

«Таза Қазақстан» республикалық экологиялық акциясы аясында Еңбекші ауданындағы Әлімбетов көшесінің бойында «Таза аула» акциясы өтті.

Аудан тұрғындары, белсенді жастар мен «Жасыл ел» жасақтарының мүшелері қатысқан іс-шарада аулаларды ретке келтіру, тазалау, қоқыстарды шығару, қоршаулар мен орындықтарды сырлау және абаттандыру жұмыстары жүргізілді.

Еңбекші ауданы бойынша «Жасыл ел» штабының үйлестірушісі Айгерім Нұрлан: «Президентіміздің тапсырмасына сай, қаламыздың барлық аудандарында осындай экологиялық акциялар өтіп жатыр. Бүгін қала тұрғындарымен бірлесіп, аулаларды тазалау жұмыстарын жүргізіп жатырмыз. Алдағы уақытта осындай экологиялық акцияларға белсенді қатысамыз», - дейді.