Үшінші мегаполис—Шымкенттің медицинасында тың жаңалықтар көп. Қаладағы емдеу мекемелерінде күрделі оталар жасау қолға алынуда. Қазір науқастар бұрынғыдай Алматы, Астанаға сабылмай, Шымкентте сапалы медициналық көмекті пайдалана алады. Жуырда Шымкентте алғаш рет аурухана базасында госпиталдық фармация бөлімшесі ашылды. Бұл жөнінде Шымкент қаласының Өңірлік коммуникациялар қызметі хабарлады.

Шымкент қаласының Денсаулық басқармасының мәліметі бойынша бөлімше Қалалық балалар клиникалық аурухана базасында ашылған. Оның іші қажетті медициналық жабдықтармен, медициналық және ламинарлық шкафтармен, ротациялық орау машинасымен жабдықталған.

Бөлімшенің басты міндеті дәрілік заттарды уақтылы, сапалы дайындау және пневматикалық пошта арқылы медициналық ұйымның клиникалық және пара-клиникалық бөлімшелеріне жеткізу болып табылады.

«Денсаулық сақтау саласы Шымкент қаласында балалар ауруханасында үлкен жетістіктерге жеттік деуге болады. Бұл бөлімшеге біз біраздан бері осыған жетеміз деп жүргенбіз, бұл бөлімше дәріні тиімді рационалды пайдалануға керек. Өйткені осыған дейін дәріні әр баланың салмағына, балаға керектігіне байланысты дәрігер тағайындайды.

Ал тағайындаған кезде дәрінің 20мл немесе 50 мл болуы мүмкін, сол дәрінің кеп бөлігі пайдаланылмайды, өйткені дәріні бір ашқаннан кейін стерильді препарат болғаннан кейін болмайды. Ал енді қазіргі енгізіп жатқан жүйе тиімді пайдаланып бір емес екі балаға,үш балаға тиісті сақтай отырып пайдалануға жол береді»,- деді қалалық денсаулық сақтау басқармасының басшысы Н.Асылбеков.

Яғни, қаланың ауруханаларында госпитальдық фармация бөлімшесін ашу нәтижесінде дәрілік заттарды ұтымды пайдалану есебінен бюджет қаражатын айтарлықтай үнемдеуге болады.

Осыған орай биыл 6 медициналық ұйымды госпиталдық фармация бөлімімен қамтамасыз ету жоспарланған.