Шымкент қаласы әкімінің бірыңғай қабылдауында 200 азаматтың өтініштері мен ұсыныстары қаралды. Бұл туралы Шымкент қаласы әкімінің баспасөз қызметі хабарлады.

Қала әкімі Ғабит Сыздықбеков алдын ала жазылған азаматтарды қабылдап, өтініштері мен ұсыныстарын қарастырды. Мәселелердің басым бөлігі тұрғын үй кезегі, әлеуметтік көмек, жұмыспен қамту, білім, жер телімін заңдастыру бағыттарын қамтыды. Сонымен қатар қабылдауға кәсіпкерлікке бет бұрған азаматтар да келіп, жаңа жобалары мен бастамаларын ұсынды. Қала басшысы әлеуметтік маңызы бар ұсыныстармен келген тұрғындарға алғыс айтып, сала басшылары мен аудан әкімдеріне қолдау көрсету бойынша нақты тапсырмалар берді.

Әкім орынбасарлары, аудан әкімдері мен басқарма басшылары 200 тұрғынның арыз-шағымын тыңдады. Ғабит Сыздықбеков азаматтар тарапынан көтерілген әрбір мәселе жіті бақылауда болатынын және заң шеңберінде шешілетінін жеткізді. Сондай-ақ жауаптыларға кері байланысты күшейтіп, өзекті мәселелерді шешуде халықтың пікірін, талап-тілегін ескеруді тапсырды.

Айта кетері, бұған дейін Мемлекет басшысы Қасым-Жомарт Тоқаев өзінің Жолдауында:

--Әділетті мемлекет азаматтардың мүддесін қорғау жолында

Заң үстемдігі орнықпаса және аза­мат­тардың қауіпсіздігіне кепілдік берілмесе, әлеуметтік-экономикалық дамудың бір­де-бір міндеті табысты жүзеге асырылмайды.  «Халық үніне құлақ асатын мемлекет» – бұл, шын мәнісінде, «Әділетті мем­лекет» құру тұжырымдамасы. Азамат­тардың мәселелерін тыңдап, көріп қана қою жеткіліксіз. Ең бастысы – дұрыс жә­не әділ шешім шығару қажет. Азаматтар мүддесіне қызмет ететін мем­лекеттің жаңа стандарттарын әзірлеу үшін көп жұмыс атқаруымыз керек. Осы тұр­ғыда құқық қорғау және сот жүйеле­ріне негізгі рөл жүктеледі. Бұл салаға ре­форма аса қажет.

Жағдай жедел өзгеруде. Күштік құ­ры­лымдар жұмыстың озық әдістеріне кө­бірек ден қойған сайын олардың ха­лық­­аралық тәжірибелерге бейімделу мүм­кін­дігі арта түседі.

Еліміздегі бүгінгі ахуалға орай азамат­тардың сұраныстарына ықылас танытуға тиіс құқық қорғау органдарының алдына жаңа талаптар қойылуда,--деп атап өткен болатын.