World Boxing Organization қазақстандық орта салмақтағы әлем чемпионы Жәнібек Әлімханұлына допингке байланысты бір жылға жарыстардан шеттету жазасын тағайындады, деп хабарлайды Оinet.kz порталы Sports.kz-ке сілтеме жасап.

Ұйым мәліметінше, спортшының сынамасынан тыйым салынған мельдоний заты анықталған. Соған қарамастан, чемпиондық атақтар Әлімханұлының өзінде қалдырылды.

Шеттету мерзімі ішінде боксшыға кез келген кәсіби немесе көрме жекпе-жектеріне қатысуға тыйым салынады. Орта салмақтағы бәсекелестікті сақтау мақсатында WBO уақытша чемпиондық белбеу үшін жекпе-жек өткізуге рұқсат берді. Рейтингтің бірінші сатысындағы Дензел Бентли екінші орында тұрған Энди Сааведрамен қолғап түйістіреді.

Ұйым сондай-ақ шеттету мерзімі аяқталғаннан кейін Әлімханұлы уақытша чемпионмен міндетті түрде жекпе-жек өткізуге тиіс екенін растады. Бұл талап орындалмаған жағдайда регламентке сәйкес қосымша санкциялар қолданылуы мүмкін. Аталған шешімге дейін аралық кездесу өткізуге жол берілмейді.

WBO президенті Густаво Оливьеринің айтуынша, Чемпиондық жекпе-жектер жөніндегі комитет шешімді бірауыздан қабылдаған. Жаза мерзімі 2025 жылғы 2 желтоқсаннан бастап есептеледі.

Еске салайық, 2025 жылдың желтоқсан айының басында WBA чемпионы Эрисланди Ларамен үш белбеу үшін жоспарланған жекпе-жек алдында қазақстандық спортшының допинг сынамасынан мельдоний табылғаны белгілі болған еді.

Айта кетейік, шеттетуге қарамастан, Жәнібек Әлімханұлы WBO рейтингінде көш бастап тұр.