Oinet.kz — ақпараттық-сараптамалық сайт

Ордабасыға туристер ағылатын күн алыс емес

09.11.2017 | 11:14
Ордабасыға туристер ағылатын күн алыс емес

Оңтүстік Қазақстан облысында Ұлт жоспары «100 нақты қадамда» туризм саласын дамыту тапсырмасына орай бірқатар шаралар атқарылуда. Облыс әкімі Жансейіт Түймебаевтың тапсырмасына сәйкес, Ордабасы тауында ескерткіш орнатып, туристер келіп тамашалайтындай абаттандыру жұмыстарының басталуы осыған дәлел. Осыған байланысты өңір басшысы Ордабасыға арнайы барып, тиісті сала жетекшілерімен жаңа жобаның нобайын талқылады. Облыс әкімі ұсыныстарды тыңдап, өз ойын ортаға салды. Бұл туралы ОҚО әкімінің баспасөз қызметінің мамандары хабарлады. «Ордабасы тауы – халық келіп рухани тынығатын, рух жинайтын, ойын тазартатын орын болуы керек. Салуға тиісті ескерткіштің  де еңселі болуы қажет. Сонымен қатар, ашық аспан астындағы амфитеатр болуы тиіс. Келуші туристерге де жағдай жасап, арнайы естелік сыйлықтар сататын дүкендер ашу керек. Болашақта халықтың мұнда кең даланы тамашалап, таза ауамен тыныстап, демалып қайтқаны дұрыс болар еді. Халқымыздың жаратылысында кең дала ерекше маңызға ие екендігін білесіздер. Сондықтан да осындай далаға және биіктікке шыққанда жанымыз айрықшы жігерленіп, руxтанып кетеді. Бұл ұлтымыздың ерекшелеу болмысын қайта түлету үшін қасиетті Ордабасы тауын осындай руx алатын орынға айналдырғанымыз абзал болар еді" - деді Жансейіт Қансейітұлы. Сондай-ақ, облыс әкімі 1993 жылы Елбасы Нұрсұлтан Назарбаевтың Ордабасыда түркі тілдес үш елдің басшыларының басын қосқанын айтты. Айта кетерлігі, алдағы жылы бұл датаға 25 жыл толады.  Бұдан бөлек, өңір басшысы 1 мың гектар аумақты алып жатқан қастерлі жердің кіре берісіне жол мен демалыс орындары, дәмханалар салынатынын атап өтті. Сонымен қатар, тиісті басқарма басшыларына аталған жобалар 2018 жылы толық аяқталуы қажеттігін тапсырды. 

 
Көрілді: 77
Жаңартылған: 15.11.2017 | 11:16
Категориялар: Қоғам, Қоғамдағы басты жаңалықтар