Oinet.kz — ақпараттық-сараптамалық сайт

Түркия мен ОҚО арасында екі жоба іске аспақ

13.09.2017 | 13:04
Түркия мен ОҚО арасында екі жоба іске аспақ

Ұлт жоспары 100 нақты қадамның 54-ші қадамында кәсіпкерлік, шағын және орта кәсіпкерлікті дамыту жайы көзделген. Осы орайда Оңтүстік Қазақстан облысында ауқымды шаралар атқарылуда. Нақтырақ айтқанда ОҚО-да  түркиялық инвесторлармен құны 12 млн. АҚШ доллары болатын екі жоба жүзеге аспақ. Бұл туралы облыс әкімінің баспасөз қызметі хабарлайды.

Мұндай келісімге түрік бизнес–құрылымдарының жетекшілері бастаған делегацияның Астана қаласына жасаған жұмыс сапары кезінде қол жеткізіліп отыр.

Қазақстанға жасаған сапары кезінде елордамыз - Астанада «Оңтүстік» индустриалды аймақтардың басқарушы компаниясы мен түркиялық бизнесмендер арасында құны 12 млн. АҚШ долларын құрайтын инвестициялық екі құжатқа қол қойылды.

Күнгейдегі қазақ-түрік индустриалды аймағында осы жылы іске асырылатын жобаның бірі - қорғасын концентратын өндіретін түркиялық Merkez Asia Madencilik компаниясының зауыты (құны 2 млн. АҚШ доллары) болса, екіншісі -  құны 10 млн. АҚШ доллары болатын Petronet Otomosyon компаниясының жанар-жағармай тарату колонкаларын шығаратын зауыты.

Бүгінде аумағы 50 гектарды алып жатқан «Қазақ-түрік» индустриалды аймағында жалпы құны 37,5 млн. АҚШ долларын құрайтын 8 жоба жүзеге асырылуда. Аталған жобалар іске қосылғанда жаңа 900 жұмыс орны құрылады деп жоспарлануда.

Айта кетейік, жыл соңына дейін аталған индустиалды аймақта «Gold Aluminum» ЖШС-нің ПВХ профильдері мен ПВХ және алюминийден жасалған мөлдір конструкцияларды өндіретін шағын цехы іске қосылады.

Еске салсақ, 9 қыркүйек күні Қазақстан Республикасының Премьер-Министрі Бақытжан Сағынтаевтың Түркияның бизнес құрылымдарының өкілдерімен кездесуі өткен болатын. 

 

 

 
Көрілді: 107
Жаңартылған: 13.09.2017 | 13:10
Категориялар: Қоғам, Қоғамдағы басты жаңалықтар